Matapos ang dalawang dekada, nagbabalik si Vina Morales sa Kapuso network at bibida sa isang serye kasama ang batikang-kontrabida Gladys Reyes.

Sa ulat ng 24 Oras Weekend nitong Sabado, sinabi ni Vina na excited na siya sa mga bagong oportunidad sa network kung saan din siya unang nakilala.

"Actually, hindi ako mapakali. Sobrang, alam mo ‘yung mixed emotions? I had butterflies in my stomach going down the car nu'ng nasa basement na. Sabi ko ninenerbyos ako, ano ba ‘yung feeling na ganito," sabi ni Vina sa Chika Minute report ni Lhar Santiago.

Mapanonood si Vina sa pinakabagong GMA series na "Cruz vs. Cruz" kasama si Gladys, na matagal na niyang kaibigan at ka-member sa Thursday group ng "That's Entertainment" ni Kuya Germs.

Common-law wife ang role ni Vina sa nasabing serye.

"Lahat maka-re-relate kasi its 'Cruz vs. Cruz,' so dalawang pamilya na nangyayari... it's based on a true to life story. I am Thelma Ruiz-Cruz, ako 'yung common-law wife," sabi ni Vina.

Kasama sa series sina Neil Ryan Sese, Pancho Magno, Lexi Gonzales, Kristoffer Martin, Elijah Alejo, at Caprice Cayetano.

Ididirehe ito ni Gil Tejada.

Sa ngayon ay wala pang detalye kung kelan eere ang nasabing programa.